عرب ممالک کا اسرائیل سے تعلقات بڑھا نا قابل افسوس ہے ، علامہ حافظ ریاض نجفی

وفاق المدارس الشیعہ کے پاکستان کے صدر علامہ حافظ سید ریاض حسین نجفی نے کہا ہے کہ 57 اسلامی ممالک کے حکمران عیش وعشرت میںمصروف ہیں۔یہ ممالک اللہ کی نعمات اور قدرتی وسائل سے مالا مال ہونے کے ذلت کی زندگی گزار رہے ہیں۔ اللہ تعالیٰ فرماتا ہے کہ یہودو نصریٰ کو اپنا سرپرست نہ بناؤ،لیکن افسوس پاکستان سمیت کئی مسلم ممالک امریکہ، اسرائیل اور دیگر ظالم ممالک کے سامنے جھکے ہوئے ہیں۔ اکثر عرب ممالک فلسطینیوں کے قاتل، قبلہ اول کے غاصب اور قابض ناجائز ریاست اسرائیل سے تعلقات پروان چڑھارہے ہیں اور اسرائیل کو سفارتی طور پر تسلیم بھی کر لیاگیا ہے،
مگر اللہ تعالیٰ کہتا ہے کہ یہود و نصاریٰ کے سامنے نہ جھکو ورنہ تمہارا کوئی حامی اور مددگار نہ ہو گا۔ انہوں نے کہا کہ ہمارا حال یہ ہے کہ پہلے امریکہ اور اب اسرائیل کے سامنےبھی جھک چکے ہیں۔ علی مسجد جامعہ المنتظرلاہور میں خطبہ جمعہ دیتے ہوئے حافظ ریاض نجفی نے کہا کہ غلط کاموںکے باوجود مسلمانوں پر استغفار کرنیوالوں کی موجودگی کی وجہ سے اجتماعی عذاب نہیں آ رہا حالانکہ مسلم معاشرہ اخلاقی دیوالیہ پن کا شکار ہے، جس پر عذاب ہونا یقینی ہے مگر ایسا صرف اس لئےنہیں ہو رہا ہے، کہ اچھے لوگ موجود ہیں جو امربالمعروف و نہی عن المنکر کا فریضہ سر انجام دے رہے ہیں، نماز روزہ کا حکم اور برائیوں سے منع کرتے ہیں۔ پیغمبر اکرم صلی اللہ علیہ وآلہ وسلم نے فرمایا جو کسی
پر رحم نہیں کرتا اس پر بھی قیامت کے دن رحم نہیں کیا جائے گا۔ ان کا کہنا تھا کہ رحم صرف خاص دوستوں اور من پسند افرادپر ہی نہیں کیا جاتا بلکہ عامۃالناس پر بھی رحم کریں۔ ستم ظریفی تو یہ ہے کہ اگر بڑے آدمی سے کوئی غلط کام ہو جائے تو مسکرانے لگتے ہیں جبکہ وہی کاماگر کسی اور سے سرزد ہو تو سخت سے سخت سزا دی جاتی ہے حالانکہ ایسا نہیں ہونا چاہیے۔